Sun07052015

Back You are here: Home PREVENTION INITIATIVES

PREVENTION INITIATIVES

Fundi sanifu ahukumiwa kifungo cha mwaka mmoja na miezi sita

Aliyekuwa Fundi Sanifu wa Idara ya Maji (W) ya Geita, Ndugu JOEL KALEMELA MAGOHE amehukumiwa kifungo cha mwaka mmoja na miezi sita au kulipa faini ya kiasi cha Tsh 500,000/ pamoja na kulipa hasara aliyoisababishia Serikali kupitia Halmashauri ya Wilaya ya Geita, katika kesi namba 02/2013 ya uhujumu uchumi iliyokuwa inamkabili pamoja na makosa mengine chini ya Sheria ya Kuzuia na Kupambana na Rushwa Namba 11/2007.

Ndugu Magohe pamoja na wenzake ambao ni Hamis Greyson Katoka Mbaruku ambaye ni Mkurugenzi na msimamizi wa miradi katika Kampuni ya WEDECO na Bi Mwanaisha Tumbo Ally ambaye ni Meneja Mkuu wa Kampuni hiyo ya WEDECO walifunguliwa mashitaka tarehe 4/4/2013 katika Mahakama ya Wilaya Geita.

Washitakiwa walifikishwa mahakamani kwa makosa ya kutumia nyaraka kwa nia ya kumdanganya mwajiri kinyume na kifungu cha 22 cha Sheria ya Kuzuia na Kupambana na Rushwa Namba 11/2007 pamoja na kuisababishia Serikali hasara kinyume na Aya ya 10 jedwali la kwanza na kifungu cha 57(1) kikisomwa pamoja na kifungu cha 60(1) cha Sheria ya Uhujumu Uchumi Sura ya 200 ya mwaka 2002. Ndugu Magohe na wenzake walikana mashitaka hayo baada ya kusomewa na Mwanasheria wa TAKUKURU Bi. Dorothea Kinyonto.

Baada ya kesi kusikilizwa Ndg. Hamis Greyson na Bi Mwanaisha Tumbo wote watumishi wa Kampuni ya WEDECO walionekana hawana kesi ya kujibu hivyo waliachiwa huru na mahakama huku ndugu Magole akiendelea na utetezi.

Mnamo tarehe 23/03/2015 Hakimu Mfawidhi wa Mahakama ya Wilaya ya Geita Mh. Desdery Kamugisha mbele ya wanasheria wa TAKUKURU ndugu Augustino Mtaki na Bi Felister Chamba, alimsomea Ndg. Magohe kuwa kwa kusaini ripoti ya kukamilika kwa mradi wa ujenzi wa Nyumba ya Pampu ya maji bila kujiridhisha kama imekamilika, hivyo kwa uzembe na kutokuwajibika kwake aliisababishia Serikali hasara ya kiasi cha fedha za kitanzania Tshs milioni tatu laki sita na elfu tisini(3,690,000/=) na Mahakama imemuhukumu kifungo cha mwaka mmoja na miezi sita (Miezi 18) jela au fani ya kiasi cha Tsh 500,000/= pamoja na kulipa hasara ya Tsh 3,690,000/= aliyoisababishia Serikali kupitia Halmashauri ya (W) Geita.

TAKUKURU (M) wa Geita inatoa wito kwa wananchi wa Geita kutoa taarifa za miradi yote ya maendeleo ambayo wanaitilia shaka katika utekelazaji wake. “ Miradi yote ambayo wananchi wanadhani imetekelezwa chini ya kiwango watoe taarifa TAKUKURU na TAKUKURU tutafanya kazi” Alisema ndugu Thobias Ndaro, Mkuu wa TAKUKURU (M) Geita.

Imetolewa na Bw. Thobias Ndaro - MKUU WA TAKUKURU (M) GEITA, Ijumaa tarehe 27/03/2015

Hakimu afikishwa Mahakamani kwa Hongo-Ruvuma

Taasisi ya Kuzuia na Kupambana na Rushwa (TAKUKURU) Mkoa wa Ruvuma imewafikisha mahakamani Mheshimiwa DEUSDEDIT MALEBO Hakimu wa Mahakama ya Mwanzo Mjini Songea na ndugu MICHAEL JOHN HAULE aliyekuwa askari wa Jeshi la Polisi kituo kikuu cha Polisi Songea kwa kosa la kuomba na kupokea rushwa kinyume na kifungu cha 15 cha Sheria ya Kuzuia na Kupambana na Rushwa namaba 11 ya 2007.

Watuhumiwa hao wamefunguliwa kesi ya jinai nambari 15/2015 na mwendesha mashitaka wa TAKUKURU bwana HERMAN MALIMA mbele ya Mheshimiwa Hakimu SIMON KOBELO wa Mahakama ya Hakimu Mkazi Songea.

Awali ilipokelewa taarifa kwamba Washitakiwa hao kwa pamoja, mnamo tarehe 02/01/2015 siku ya Ijumaa, waliomba rushwa ya shilingi 150,000 (Laki moja na nusu) kutoka kwa mlalamikaji ili wasimpeleke mahabusu kwa madai kwamba hakuitikia wito wa mahakama katika kesi ya madai iliyokuwa imefunguliwa dhidi yake. Siku hiyo watuhumiwa hao walipokea kiasi cha shilingi 50,000 (Elfu hamsini) kwa ahadi kwamba kiasi kilichobaki cha shilingi 100,000 (Laki moja) angekamilisha siku ya Jumanne tarehe 06/01/2015.

Baada ya TAKUKURU kupokea taarifa hiyo na kufanya uchunguzi wa kina ilibaini kwamba washitakiwa hao walitenda kosa la kuomba na kupokea hongo kinyume cha Sheria ya Kuzuia na Kupambana na Rushwa Na. 11 ya mwaka 2007. Washitakiwa wote wamekana mashitaka na wameachiwa kwa dhamana.

TAKUKURU mkoa wa Ruvuma inatoa wito kwa wananchi wote kuendelea kutoa ushirikiano katika mapambano dhidi ya vitendo vya rushwa kwa kufichua na kutoa taarifa za watu wanaojihusisha na vitendo hivyo ili wachukuliwe hatua za kisheria.

 

Imetolewa na YUSTINA CHAGAKA-Mkuu wa TAKUKURU (M) Ruvuma - 19/02/2015

Watumishi wa TASAF Mafia wapandishwa kizimbani

Taasisi ya kuzuia na kupambana na Rushwa Wilaya ya Mafia tarehe 18/03/2014 imewapandisha kizimbani katika Mahakama ya Hakimu Mkazi Mfawidhi Wilaya ya Mafia watumishi watatu (03) waliokuwa watekelezaji mradi wa TASAF (Tanzania Social Action Fund ) Halmashauri ya Wilaya ya Mafia. Watumishi hao kwa majina ni Charity Edmore Sichona (36), Cotilde Benedict Gama(48) na Jimmy William Mhina(49).

Akisoma hati ya mashitaka mbele ya Mh. Hassan Makube (Hakimu Mkazi Mwandamizi wa Mahakama ya Wilaya Mafia, Mwendesha Mashitaka wa Taasisi ya Kuzuia na kumbana na Rushwa Wilson Ntiro aliieleza mahakama kwamba, kwa kutumia mamlaka waliyokuwa nayo kama mratibu, mhasibu na muwezeshaji (facilitator) wa mfuko wa TASAF katika Wilaya ya Mafia wote kwa pamoja walikula njama na kutenda kosa la kutumia nyaraka kwa nia ya kumdanganya mwajiri kinyume na kifungu 22, cha Sheria ya Kuzuia na Kupambana na Rushwa na 11 ya mwaka 2007 pamoja na kifungu 333, 335(a) na 337 cha kanuni ya adhabu sura ya 16 rejea ya mwaka 2002.

Kwa mujibu wa mashitaka, makosa waliyotenda washitakiwa hao ni pamoja na kula njama, kutumia nyaraka kumdanganya mwajiri, kugushi, na wizi wa mali ya umma - kosa kwa mujibu wa kifungu 258 na 270 cha kanuni ya adhabu sura ya 16 rejea ya mwaka 2002.

Mahakama ilielezwa kuwa upelelezi wa kesi hii umekamilika, washitakiwa wote wako mahabusu huku utaratibu wa dhamana zao ukiendelea kushughulikiwa. Kila mshitakiwa ametakiwa kuwa na wadhamini watatu na kwa dhamana ya Shilingi za Tanzania milioni tatu (3,000,000/=) tu kwa kila mshitakiwa. Kesi hii imepangiwa tarehe ya kutajwa.

Imetolewa na

RAMADHANI S.MLANZA

MKUU WA TAKUKURU (W) MAFIA

KIBAHA PWANI.

Tanzania yachaguliwa kuwa Mjumbe wa Bodi ya Umoja wa Afrika ya Ushauri juu ya Masuala ya Rushwa

TAARIFA KWA VYOMBO VYA HABARI

BW. EKWABI WEBSTER TEKERE MUJUNGU – MKURUGENZI WA IDARA YA UTAWALA NA USIMAMIZI WA RASILIMALI WATU TAKUKURU ACHAGULIWA KUWA MJUMBE WA BODI YA UMOJA WA AFRIKA YA USHAURI KUHUSU MASUALA YA RUSHWA (AU ADVISORY BOARD ON CORRUPTION).

Mkurugenzi wa Idara ya Utawala na Usimamizi wa Rasilimali Watu – TAKUKURU Bw. Ekwabi Mujungu, amechaguliwa kuwa Mjumbe wa Bodi ya Umoja wa Afrika ya Ushauri juu ya Masuala ya Rushwa – ‘African Union Advisory Board on Corruption’.

Uchaguzi huo ulifanyika katika kikao cha 24 cha Wakuu wa Nchi wanachama wa Umoja wa Afrika kilichofanyika Januari, 2015 - Addis Ababa Ethiopia. Kwa mujibu wa taarifa iliyotolewa tarehe 11/02/2015 na ofisi ya Makao Makuu ya umoja huo iliyoko ADDIS ABABA ETHIOPIA, wadhifa huo utadumu kwa muda wa miaka miwili.

Bodi hii ambayo makao makuu yake yapo jijini Arusha – Tanzania, jukumu lake kuu ni kushauri na kusimamia masuala ya Rushwa kwa nchi wanachama wa Umoja wa Afrika. Wajumbe wengine waliochaguliwa katika Bodi hii ni kutoka nchi za Cote d’lvoire, Togo, Burundi, Ghana, Benin, Sierra Leone, Nigeria, Lesotho, Kenya na Zimbabwe.

Tanzania inajivunia kuwa Mjumbe wa Bodi hii tangu kuanzishwa kwake ambapo Mkurugenzi Mkuu wa TAKUKURU Dkt Edward Hoseah alikuwa Mjumbe na Mwenyekiti wa Bodi hii kwa kipindi cha 2011-2014.

 

metolewa na Doreen J. Kapwani - Afisa Uhusiano wa TAKUKURU, Jumanne tarehe 17/02/2015

Wawili wapandishwa kizimbani

Mnamo tarehe 11/03/2014 TAKUKURU Wilaya ya Mvomero iliwafikisha mahakamani Washitakiwa wawili kwa makosa ya Matumizi Mabaya ya Mamlaka chini ya kifungu na. 31 cha Sheria ya Kuzuia na Kupambana na Rushwa Na. 11 ya mwaka 2007 na kuisababishia Serikali hasara chini ya Sheria ya Uhujumu Uchumi ya mwaka 1984 (RE: 2002).

Washitakiwa hao ni Bibi. SARAH PHILBERT LINUMA (61) ambaye alikuwa Mkurugenzi Mtendaji wa Halmashauri ya Wilaya Mvomero na kustaafu mwaka 2013 pamoja na Bibi ANNA ANDULILE MWAKALYELYE (53) ambaye ni Afisa Utumishi wa Halmashauri ya Wilaya ya Mvomero ambaye pia alikuwa Mwenyekiti wa Bodi ya Zabuni ya Halmashauri hiyo katika kipindi cha mwaka 2007-2010.

Ilielezwa mahakamani kwamba Washitakiwa hao wakiwa waajiriwa wa Halmashauri ya Wilaya ya Mvomero, kwa nafasi zao kama Mkurugenzi Mtendaji na Mwenyekiti wa Bodi ya zabuni katika kipindi cha kati ya tarehe 5 mwezi Mei  na 28 mwezi Septemba mwaka 2009 walitumia mamlaka yao vibaya kwa  kukiuka Sheria ya Manunuzi ya Umma ya mwaka 2004. 

 

Washitakiwa walitenda kosa hilo kwa kumpatia LUCAS CONSTRUCTION COMPANY LIMITED zabuni ya ujenzi wa jengo la ofisi za Halmashauri ya wilaya ya Mvomero awamu ya tatu kwa kufanya kazi moja tu ya uwekaji wa paa kwa gharama ya kazi zote zilizopaswa kufanyika katika zabuni iliyotangazwa ambazo ni; kuweka paa, kazi za bomba, plasta na umeme ambapo kwa kufanya hivyo waliisaidia kampuni ya LUCAS CONSTRUCTION COMPANY LIMITED kupata manufaa isiyostahili ya mkataba wa Tsh 365,059,674/= .

Washitakiwa wote kwa pamoja kwa kitendo chao cha kutumia mamlaka yao vibaya kwa kukiuka sheria ya manunuzi ya umma kwa kumpatia zabuni LUCAS CONSTRUCTION COMPANY LIMITED kufanya kazi moja ya kuweka paa pekee kwa gharama ya kazi zote zilizopaswa kufanywa katika zabuni iliyotangazwa wameisababishia Serikali hasara ya TZS 83,455,474/= ikiwa ni gharama ya kazi ambazo hazikufanywa chini ya Sheria ya Uhujumu Uchumi ya  mwaka 1984 (CAP 200)  (RE: 2002).kifungu cha 10(i) Jedwali la kwanza.

Washitakiwa hao wamefunguliwa Kesi ya Uhujumu Uchumi Namba ECC 4/2014 katika Mahakama ya mkoa wa Morogoro na Kesi hii itakuja tena mahakamani tarehe 25/3/2014 kwa ajili ya maelezo ya awali (Preliminary Hearing).

Imetolewa na Eufrasia Kayombo,

Mkuu wa TAKUKURU Wilaya ya Mvomero

Machi  11,2014

 

 

Afisa manunuzi wa halmashauri ya Serengeti afikishwa Mahakjama na wafanyabiashara

Taasisi ya Kuzuia na Kupambana na Rushwa Mkoani Mara imemfikisha katika Mahakama ya Wilaya ya Serengeti Mkuu wa kitengo cha manunuzi wa Halmashauri ya Wilaya ya Serengeti Bi Restituta Mniko na wafanyabiashara wawili wa mjini Musoma ambao ni Mkurugenzi wa kampuni ya Kajara Auction Mart Shaban Kajara Wambula na mbia wake kibiashara Marwa Magige Wambura kwa makosa ya kula njama ambapo wamefunguliwa kesi ya jinai namba 115 ya mwaka 2014

Washitakiwa hao walifikishwa Mahakamani hapo na Mwendesha mashitaka wa TAKUKURU wakili Eric Kiwia mnamo tarehe 24/07/2014 na kesi hiyo ipo mbele ya hakimu mfawidhi wa mahakama hiyo mheshimiwa Kahimba

Pamoja na kosa la kula njama linalowakabili washitakiwa wote watatu, Bi Restituta Mniko pia anashitakiwa kwa kosa la matumizi mabaya ya madaraka.

Akitoa ufafanuzi wa mashitaka hayo, Mkuu wa TAKUKURU Mkoa wa Mara wakili Holle Makungu alieleza kwamba, kati ya mwezi May na July 2013 mshitakiwa wa kwanza ambaye alikuwa Mkuu wa kitengo cha manunuzi cha Halmashauri hiyo, alishiriki kama Mwenyekiti katika kikao cha ufunguzi wa zabuni mbalimbali ikiwemo iliyohusu wakala wa kukusanya ushuru wa mbao za matangazo katika Halmashauri ya Wilaya ya Serengeti kwa mwaka wa fedha 2013/2014

Baada ya ufunguzi wa zabuni hiyo, mshitakiwa kwa cheo chake alitunza nyaraka za zabuni kwa ajili ya kuziwasilisha katika kamati ya tathmini. Hata hivyo kabla ya kuziwasilisha kwenye kamati ya tathmini, alikula njama na mshitakiwa wa pili na tatu na kubadilisha nyaraka za zabuni ya wakala wa kukusanya ushuru wa mbao za matangazo ili kuonyesha kwamba, Kampuni ya Kajala Auction Mart ilikuwa imeomba zabuni hiyo ikionyesha kwamba kama ingepewa zabuni hiyo ingewasilisha Halmashauri shilingi laki tatu na elfu thelathini (Tshs.330,000/=) kila mwezi wakati ukweli ni kwamba, siku ya ufunguzi wa zabuni hiyo nyaraka za kampuni hiyo zilionyesha kwamba iliomba zabuni hiyo ya kukusanya ushuru wa matangazo wakieleza wangewasilisha Halmashauli shilingi laki moja sabini na nane elfu mia tatu thelathini na tatu tu (tshs.178,333/=) kwa mwezi.

Kutokana na njama hizo za kubadilishwa kwa nyaraka za zabuni, kamati ya tathmini na bodi ya zabuni zilipotoshwa na hivyo kuipitisha kampuni ya Kajara Auction Mart kama mshindi wa zabuni ya kukusanya ushuru wa mbao za matangazo katika halmashauri ya wilaya ya Serengeti badala ya kampuni ya Damo General Enterprises iliyokuwa inastahili kupewa zabuni hiyo.

Washitakiwa wote watatu walikana mashitaka hayo na wawili wako nje kwa dhamana na kesi hiyo itaendelea Mahakamani hapo tarehe 7/8/2014 kwa usikilizwaji wa maombi ya dhamana ya Mkurugenzi wa Kajala Auction Mart Shaban Kajala Wambula ambaye alishindwa kutimiza masharti ya dhamana ambayo ni kuwa na wadhamini wawili kwa bondi ya million nne kila mmoja.

TAKUKURU Mkoa wa Mara inatoa wito kwa kampuni ambazo zinanyimwa zabuni zinazostahili kutokana na njama kati ya kampuni shindani na watendaji katika Halmashauri, mashirika ya umma na Idara za Serikali ziwe na uthubutu wa kutoa taarifa ili wahusika waweze kuchukuliwa hatua za kisheria kama ilivyofanyika kwenye uchunguzi huu.

Imetolewa na Holle J. Makungu,

Mkuu wa TAKUKURU (M)

MARA

Taarifa kwa Vyombo vya Habari Tukio la Ujambazi Zanzibar

Mkurugenzi Mkuu wa TAKUKURU Dkt. Edward Hoseah amesema tukio la ujambazi lililoripotiwa kutokea mjini Zanzibar Januari 13, 2014 na kumhusisha mtumishi wa TAKUKURU ni tukio lililoichafua sifa ya chombo hiki. Bofya hapa kusoma taarifa kamili

Tanzania yachaguliwa kuwa kati ya nchi tatu za mfano

TANZANIA YACHAGULIWA KUWA MOJA KATI YA NCHI TATU ZA MFANO KATIKA UTEKELEZAJI WA MKATABA WA UNCAC

Mkutano wa Kimataifa wa kutathmini utekelezaji wa Mkataba wa Umoja wa Mataifa wa Kuzuia na Kupambana na Rushwa (United Nations Convention Against Corruption-UNCAC) uliofanyika Vienna-Austria mwanzoni mwa mwezi Juni, 2014, umeitangaza Tanzania kuwa moja ya nchi tatu za mfano wa kuigwa katika masuala ya Kuzuia na Kupambana na Rushwa pamoja na Utawala Bora.

Mkutano huo ulihudhuriwa na Wakuu wa Nchi na Taasisi mbalimbali duniani zilizoridhia Mkataba huu. Tanzania iliwakilishwa na Mhe. Kapt Mstaafu - George Mkuchika - Waziri wa Nchi Ofisi ya Rais Utawala Bora pamoja na Dkt. Edward Hoseah - Mkurugenzi Mkuu wa Taasisi ya Kuzuia na Kupambana na Rushwa (TAKUKURU).

Kwa mujibu wa Taarifa ya Tathimini ya Utekelezaji wa Mkataba wa UNCAC iliyowasilishwa katika Mkutano huo, Tanzania ambayo ilifanyiwa tathmini katika awamu mbili na nchi za Uingereza na Netherland (mwaka 2011/2012) pamoja na Sierra Leone na Australia (mwaka 2012/2013), imedhihirika kuwa imetekeleza makubaliano ya Mkataba huo kwa kiwango cha juu na hivyo kuwa moja ya nchi za mfano wa kuigwa na nchi nyingine duniani. Nchi nyingine zilizotajwa kuwa za mfano wa kuigwa ni Uingereza na Romania.

Katika mkutano huo kila nchi ilipewa nafasi ya kuwasilisha taarifa ya utekelezaji wa Mkataba huo ambapo Mkurugenzi Mkuu wa TAKUKURU Dkt. Edward Hoseah aliwasilisha taarifa ya nchi iliyosomeka ‘UNCAC REVIEW EXPERIENCE: GOOD PRACTICE TANZANIA’

Mkataba wa Umoja wa Mataifa wa Kuzuia na Kupambana na Rushwa Duniani (UNCAC) ulisainiwa na nchi wanachama Desemba 9, 2003 huko Merida- Mexico. Hatua hii ilifikiwa kutokana na Umoja wa Mataifa kutambua kuwa Rushwa si tatizo la Taifa moja bali la Dunia nzima na kwamba linahitaji juhudi za pamoja kukabiliana nalo.

Chini ya makubaliano ya Mkataba huu nchi wanachama wamewekewa utaratibu wa kufanyiwa tathimini ya utekelezaji wake kwa kila mwaka. Maelezo zaidi kuhusu Taarifa za Tathimini ya Utekelezaji wa Mkataba wa UNCAC kwa Tanzania yanapatikana kupitia www.pccb.go.tz

Imetolewa na Afisa Uhusiano wa TAKUKURU –Doreen Kapwani, TAKUKURU Makao Makuu, Tarehe 5/6/2014

Subcategories

  • Download Centre

    Feugiat convallis turpis massa ligula sagittis enim aliquet fringilla orci pretium. Ut Aenean Vestibulum suscipit eros pede et nibh laoreet Pellentesque mus. Aliquet ultrices dictumst justo justo tortor vitae nisl nec sem.

  • Research Papers

    Lorem ipsum dolor sit amet consectetuer pede cursus Pellentesque eros nulla. Pretium nibh feugiat Fusce nibh Curabitur consectetuer In arcu est eros. Phasellus Aliquam vitae hendrerit cursus nec elit Nam Quisque volutpat Phasellus. Id nibh interdum vitae nec enim cursus pretium pellentesque Aenean laoreet. Quisque gravida metus natoque ridiculus ac vitae mollis In Quisque suscipit. In et Fusce lorem gravida Morbi.

  • Press Releases
  • Publications

    Auctor pellentesque lobortis enim urna gravida nunc sit ligula sit eget. Suscipit sociis elit felis sed tincidunt feugiat urna orci Nam Integer. Curabitur metus pulvinar condimentum Pellentesque quam massa sed vel velit Morbi. Vestibulum dictum purus dolor Curabitur Donec malesuada faucibus congue augue et. Pellentesque pretium eu consectetuer id Proin Curabitur risus Vestibulum lorem Lorem. Turpis ullamcorper in condimentum Donec Sed Phasellus.